Pastorale Briewe: Argief
March 20, 2024Pastorale Briewe: Argief
March 20, 2024
AGS Familie
Die Apostoliese Geloofsending van Suid-Afrika se 2024 Algemene Besigheidsvergadering was op 10-12 September by Woord en Lewe in Boksburg aangebied. Tydens die vergadering het 1,683 afgevaardigdes van 1,803 geregistreerde gemeentes Nasionale Ampsdraers vir die 2024-2028 leierskapstermyn verkies. Dr Henri Weideman is herverkies as President; Pastoor Barend Petersen is herverkies as Adjunkpresident, Pastoor Selby Khumalo is herverkies as Hoofsekretaris, en Pastoor Rudi Coertzen is herverkies as Hooftesourier. Pastoor Frank Chikane was die Hoofverkiesingsbeampte. Ons wens weereens elke Ampsdraer geluk met hulle herverkiesing! Verder bedank ons Pastoor George Mahlobo (President van AFM International) vir die fasilitering van die inhuldigings seremonie wat die Nasionale Ampsdraers en hul eggenote ingesluit het.
In hierdie uitgawe van ons Pastorale Brief kyk ons weer opsommend na die kern van die Ablaze Konferensie-tema: “Herleef, Vernuwe en Verbly!” (Renew, Revive and Rejoice). Ons het elke Nasionale Ampsdraer gevra om hul Ablaze-preek in 'n kort, impakvolle artikel te herskep. Ons moedig jou aan om ons webwerf te gaan besoek vir die preek notas en regstreekse uitsendings: https://afm-ags.org/ablaze-conference-renew-revive-rejoice/.
Ons vertrou dat hierdie bronne ‘n seën sal wees tot jou lewe en bediening.
1. HERLEEF, VERNUWE, VERBLY: 'N PAD NA GEESTELIKE HERSTEL
Die lewe kan dreinerend wees. Die voortdurende eise van werk, stres en die toestand van die wêreld kan ons uitput en veroorsaak dat ons geestelik stilstaan en ver van God af voel. Ons kan bloot deur die aksies gaan, fisies teenwoordig, maar emosioneel en geestelik afwesig wees. In sulke oomblikke is dit noodsaaklik om uit te reik na God vir herlewing, vernuwing en uiteindelik vreugde.
Die Israeliete het 'n soortgelyke toestand beleef nadat hulle uit ballingskap in Babilon teruggekeer het. Alhoewel hulle terug was in hul vaderland, was baie elemente van hulle vorige bestaan, in puin. In hulle benoudheid het hulle God se herstel gesoek, nie net van hulle fisiese omgewing nie, maar ook van hulle hart en gees. Soos Psalm 85:7 (NLV) uitroep: "Sal U ons nie weer laat herlewe sodat U volk bly kan wees in U nie?" Hulle begeerte na herlewing was gewortel in 'n verlange na God se teenwoordigheid, wat hulle tot vreugde sou lei.
Psalm 126:1-2 (AFR83) vang die skoonheid van God se herstel vas: “Toe die Here die lot van Sion verander het, was dit vir ons soos ‘n droom. Ons het gelag en gesing.” Wanneer God herstel bring, is daar altyd 'n uitstorting van vreugde, 'n terugkeer na die lewegewende teenwoordigheid van die Heilige Gees.
Herlewing: Ontwaking van Ons Gees
Om te herleef, beteken om lewe, krag en bewussyn te herwin. Herlewing is 'n Goddelike werk waardeur God ons harte weer wakker maak vir Sy teenwoordigheid en doel. Deur die Heilige Gees steek Hy weer ons eerste liefde vir Jesus en die vuur van Sy teenwoordigheid in ons, aan. Maar ons moet ook 'n rol speel. Herlewing begin wanneer ons ons behoefte aan God erken en uitroep om Sy hulp. Soos 2 Kronieke 7:14 (AFR 83) ons herinner: As my volk, oor wie my Naam uitgeroep is, berou toon en bid en vra na my wil en terugdraai van hulle bose weë af, sal Ek luister uit die hemel en hulle sonde vergewe en hulle land laat herstel.”
Herlewing vra vir nederigheid, om God te soek en weg te draai van sonde. Dit is nie genoeg om bloot deur die aksies van geloof te gaan nie. Ons moet opregte en ware volgelinge van Jesus wees wat na Sy teenwoordigheid verlang. Dit beteken om gereeld besig te wees met persoonlike en gemeenskaplike gebed, bekering en om God se aangesig te soek.
“Wanneer God herstel bring, is daar altyd 'n uitstorting van vreugde, 'n terugkeer na die lewegewende teenwoordigheid van die Heilige Gees. ”
Vernuwing: Transformeer ons Gedagtes
Vernuwing is die proses van transformasie, 'n merkbare verandering in ons gedagtes, harte en lewens. Romeine 12:2 (NLV) beveel, "Moenie julle leefstyl aanpas by die gedragspatrone van hierdie wêreld nie, maar laat God julle omvorm deurdat Hy julle denkpatrone vernuwe." Net soos 'n ruspe in 'n skoenlapper verander, is vernuwing 'n voortdurende proses wat ons in nuwe skeppings in Christus omvorm. Ons moet daagliks die patrone van hierdie wêreld weerstaan en toelaat dat God se Woord en Gees in ons werk.
Efesiërs 4:22-24 (NLV) roep ons op om "die ou sondige mens soos vuil klere uit te trek " en "die nuwe mens soos skoon klere aan te trek, die mens wat na God se beeld geskape is: Iemand wat werklik reg lewe voor God en werklik aan hom toegewy is.” Hierdie vernuwing vereis dat ons die verskillende areas van ons lewens wat transformasie benodig assesseer en ons nuwe identiteit in Christus omhels.
Verbly: Vreugde as ons Reaksie
Vreugde is die natuurlike reaksie op God se werk van herlewing en vernuwing. Soos Paulus in Filippense 4:4 (AFR83) beveel, "Wees altyd bly in die Here. Ek herhaal: Wees bly!" Vreugde is nie afhanklik van ons omstandighede nie, maar is 'n keuse wat gewortel is in ons geloof en vertroue in God se goedheid. Regdeur die Skrif sien ons voorbeelde van mense soos Dawid, wat selfs in moeilike tye in die Here gejuig het.
Psalm 51:12 (AFR83) spreek sy begeerte uit: "Skep vir my ‘n rein hart. O God, vernuwe my gees en maak my standvastig.” Blydskap in God versterk ons gees en onderhou ons geloof. Dit is 'n uitdrukking van dankbaarheid vir God se voortdurende werk in ons lewens, ongeag dit waardeur ons gaan.
2. HERLEWING!
Geheue
Die menslike verstand is 'n komplekse web van verbindende neurone wat patrone en paaie vorm wat ons gedagtes, oortuigings en aksies vorm. Hierdie patrone, sodra dit gevestig is, kan ongelooflik moeilik wees om af te breek, veral wanneer dit diep gewortel is deur geslagte van kondisionering en wêreldse invloed.
Wanneer jou verstand getransformeer word, verkry jy die vermoë om te toets en goed te keur wat God se wil is (Romeine 12:1-2).
Ons begrip van hoe dinge werk asook ons lewenservarings bepaal hoe ons die stem, die wil, en die planne van God vir ons interpreteer (Jeremia 29:11).
Eer God wanneer Hy Magtig Deur Jou Werk (Rigters 15:14-19)
Die Here het Simson kragtig gebruik soos ons lees in Rigters 15:14. Simson het die eer vir die oorwinning opgeëis toe hy gesê het: "...met 'n donkie se kakebeen het ek hulle donkies gemaak." Nadat Simson die eer van die oorwinning vir homself opgeëis het, het hy sorgeloos die instrument weggegooi wat God gebruik het om die oorwinning te gee (Rigters 15:17). Simson het sy oorwinning aan sy eie krag toegeskryf en nie aan die Here wat vir hom die oorwinning gegee het nie. Daarna het hy dors geword, en die Here het 'n holte oopgekloof en wonderbaarlik water voorsien.
Ons moet versigtig wees wanneer ons ‘n oorwinning behaal het, want ons is op ons kwesbaarste nadat God ons kragtig gebruik het. Ons moet ons voorberei vir die oomblik ná die oorwinning; moenie die ondersteuning vergeet wat die oorwinning moontlik gemaak het nie - moenie die leer wegskop wat ander vir jou reggehou het om op te klim nie. In vandag se tyd waar selfverheerliking algemeen voorkom, onthou dat die eer aan die Here behoort. ‘n Herlewing rondom die konsep van nederigheid is nodig. Moet nie jouself bevorder tot geestelike ampte waarvoor jy nie in die AGS georden is nie. God kan jou gedagtes voortdurend vernuwe as jy jouself nederig maak.
“In vandag se tyd waar selfverheerliking algemeen voorkom, onthou dat die eer aan die Here behoort.”
Die Vrou met die Bloedvloeiing
Ons het almal die verhaal gelees van hoe die vrou wat twaalf jaar lank aan bloedvloeiing gely het, genees is. Ten spyte daarvan dat sy al haar hulpbronne bestee het om gesond te word, het haar situasie vererger. Dit is opvallend dat in 'n latere hoofstuk die verhaal van die genesing van 'n sekere vrou deur Jesus herroep word.
Toe Jesus en die vrou van aangesig tot aangesig gestaan het was dit duidelik dat die skare vergete was en dat Jesus met daardie vrou gepraat het asof sy die enigste persoon in die wêreld was – let wel 'n onbelangrike lydende mens met 'n probleem wat haar onrein gemaak het - en tog het Jesus alles van Homself aan daardie een onbelangrike persoon gegee. Ons is dikwels geneig om etikette aan mense te heg en hulle te behandel volgens hul relatiewe belangrikheid. Vir Jesus het 'n persoon nie hierdie mensgemaakte etikette gehad nie. Hy of sy was eenvoudig 'n menslike siel in nood. Liefde dink nooit aan mense in terme van menslike belangrikheid nie.
Die Tweede Vuur
Hierdie verhaal gaan oor 'n nuwe oggend wat aangebreek het - nie net fisies nie, maar ook as 'n simbool van die begin van 'n nuwe era. Op hierdie nuwe oggend het Jesus op die oewer verskyn, maar die dissipels het nog nie die betekenis van hierdie nuwe oggend verstaan nie omdat hulle nie besef het dat die persoon aan die oewer Jesus was nie. Toe hulle aan land kom, het 'n belangrike toneel hulle begroet. Dit was niks anders as 'n houtskoolvuur nie.
Die laaste keer toe Petrus en Jesus by 'n vuur was, was in Johannes 18, en hierdie vuur het herinneringe aan 'n onaangename situasie. ‘n Situasie van koue, vyandige ondervraging - Petrus het gevaar getrotseer, hy was alleen, bang, vreesbevange, verneder, in pyn, en sy wêreld het in duie gestort. Die eerste vuur is die toneel van Petrus se verloëning, en die tweede is vir sy herstel. Jesus gebruik die tweede vuur, met sy vis en brood, om die herinnering van die eerste vuur te vervang - om die pyn van die eerste vuur te vervang met die oorwinning van die tweede vuur, en die nuwe opdrag om sy skape te voed.
3. HERNU DIE KRAG VAN JOU GELOOF
In Hebreeus beteken die woord "HERNU" om "te verander." Hierdie konsep van transformasie word in die Skrif weerspieël, veral in 1 Samuel 10:6 (AFR83), wat sê: “Dan sal die Gees van die Here kragtig in jou werk. Jy sal saam met hulle as profeet optree en 'n ander mens word.” Dit illustreer die betekenisvolle verandering wat kan plaasvind wanneer ons God ontmoet. Jesaja 40:31 (AFR20) herinner ons daaraan: “Maar wie op die Here wag, herwin hulle krag…”. Hierdie belofte is gegrond op die begrip dat “Dit is Hy wat troon bo die ronde skyf van die aarde” (Jesaja 40:22 AFR20), dit is Hy wat nooit moeg of uitgeput raak nie. Hy stel ons in staat om oor wanhoop te triomfeer deur versterkte geloof en krag. Ons word geroep om aktief deel te neem aan hierdie hernuwingsreis, met die wete dat ons krag nie uit onsself kom nie, maar van die Here.
God se Mense en Fases van Hernuwing in Jesaja 40
Jesaja stel ’n reis van wanhoop na hernuwing voor:
-
Ons Wanhoop (40:27): Die Israeliete het wanhoop ervaar tydens ballingskap, en hulle het bevraagteken of God van hul situasie bewus was. Jesaja spreek hul onsekerhede aan en beklemtoon die konflik tussen geloof en twyfel.
-
God se Grootheid (40:28-29): Jesaja beklemtoon God se ewige wese, kreatiewe krag en onbeperkte sterkte. Hierdie begrip is noodsaaklik om wanhoop te oorkom.
-
Ons Hernuwing (40:30-31): Die belangrikheid van om op die Here te wag, word beklemtoon. “Wag” verteenwoordig 'n aktiewe afhanklikheid van God, vertroue in Sy tydsberekening en voorsiening.
“Ons word geroep om aktief deel te neem aan hierdie hernuwingsreis, met die wete dat ons krag nie uit onsself kom nie, maar van die Here.”
Die Arendsvlerk-Gelowige
Jesaja se metafoor van om op arendsvlerke te sweef, beeld die transformerende aard van geloof uit. Net soos God Israel “op arendsvlerke gedra het” (Eksodus 19:4), gee Hy hernude krag aan dié wat hul vertroue in Hom stel. “Hulle sal vlieg soos arende” – wat 'n voortdurende styging bo die uitdagings van die lewe beteken. “Hulle sal hardloop en nie moeg word nie.” – wat die energie en vooruitgang in geloof simboliseer. “hulle sal aanhou loop, en nie rus nie” – wat die deursettingsvermoë illustreer wat nodig is vir die daaglikse lewe, selfs tydens beproewings (Jesaja 40:31; Bybel vir Almal 2007).
Die geloofsreis kan dikwels uitputtend wees, maar God verseker ons van hernude krag:
-
Meer Krag: Psalm 84:6,8 praat van dié wie se krag in die Here is, wat van krag tot krag beweeg.
-
Meer Geloof: Romeine 1:17 beklemtoon om deur geloof te lewe, en selfs in tye van twyfel kan ons uitroep, “Help my in my ongeloof.” (Markus 9:23-24; AFR83).
God se genade is meer as genoeg in ons swakhede. Soos Paulus reflekteer in 2 Korintiërs 12:7-10, is dit in ons swakheid dat Christus se krag volmaak gemaak word. Laat ons Gideon en sy manne onthou wat ondanks hul uitputting volhard het in hul strewe in Rigters 8:4. Mag ons soos arende sweef, hardloop sonder om moeg te word en loop sonder om flou te word. Ons dank God vir die belofte van hernuwing.
4. HANDHAAF JOU VREUGDE!
Onthou jy die vreugde toe jy die Here vir die eerste keer leer ken het? Daardie opwinding dat alles nuut is. Hoekom is dit dat soveel Christene hul vreugde verloor? Sommige dinge sal jou doelbewus van jou vreugde beroof. As jy nie weet wat dit is nie en as jy nie die nodige voorsorgmaatreëls tref nie, sal jy jou vreugde verloor.
Daar is drie dinge in Filippense 3:1-10 oor hoe om jou vreugde te handhaaf terwyl jy die Here dien. Fil. 3:1 (AFR20) sê: “Verder, my broers, wees bly in die Here. Om dieselfde dinge aan julle te skryf, is nie vir my moeite nie, en aan julle gee dit vastigheid.” In hierdie gedeelte sê hy dat daar drie waarborge is om jou vreugde te beskerm.
Ons Moet Wettiese Houdings Weerstaan
Wetsbeoefening beroof jou van jou vreugde. Dit vernietig vreugde in die Christelike lewe meer as enigiets anders wat ek al gesien het. Wettiesheid vervang reëls en rituele vir my verhouding met Christus. Dit neem die fokus weg van wat God vir jou gedoen het en plaas stadig jou fokus op wat jy vir God doen. In die Nuwe Testament was daar 'n groep mense wat die Judaïsers genoem was. Hulle het gesê: “Aanvaar Jesus Christus as jou Here en Verlosser, maar jy moet ook hierdie reëls nakom.” Paulus sê: “Waak teen die honde! Waak teen die kwaadstokers! Waak teen die afsnyding! Want ons is die besnydenis, ons wat God deur sy Gees dien, ons wat ons op Christus Jesus beroem, en nie op die liggaamlike dinge vertrou nie...” Fil. 3:2-3 (AFR20). Die eerste waarborg is dit: As jy jou vreugde wil handhaaf, leef elke dag deur genade.
Wetsbeoefening is om jou vertroue in rituele te plaas. Fil. 3:5 sê: “Ek is besny op die agtste dag”. Vandag kan 'n Christen sê: “Ek is gedoop,” of “Ek het by die kerk aangesluit,” of “Ek het die nagmaal gebruik.” Paulus gaan voort om sy vorige lewe te beskryf:
Ras. Fil. 3:5 sê: “Ek is...afkomstig uit die volk Israel, uit die stam van Benjamin…” - Ek het 'n koninklike afkoms.
Godsdiens. Fil. 3:5 sê: “Ek is 'n Hebreër uit die Hebreërs.” - Daar is mense daar buite wat sou sê, “Ek is AGS!!”.
Reëls. Fil. 3:5: “Ek is...wat die wet betref, 'n Fariseër.” - Die Fariseërs was die geestelike elite.
Reputasie. Wanneer jy op reputasie staatmaak, betree jy hierdie werkheiligheid of wetsbeoefening. “...wat ywer betref, 'n vervolger van die kerk, wat geregtigheid op grond van wetsbeoefening betref, onberispelik.” Daar is niks verkeerd met enige van hierdie dinge nie. Die probleem kom in wanneer jy begin dink dat hierdie dinge jou punte gee by God, maar God het jou onvoorwaardelik lief. As jy begin om op hierdie dinge te vertrou, gaan jy jou vreugde verloor. Godsdiens is gebaseer op prestasie, maar Christenskap is gebaseer op 'n persoon, Jesus Christus.
“Godsdiens is gebaseer op prestasie, maar Christenskap is gebaseer op 'n persoon, Jesus Christus.”
Ek Moet My Aktiwiteite Herevalueer
Baie mense soek vreugde op die verkeerde plekke. Fil. 3:7-8 (AFR20) sê: “Inderdaad reken ek alles as verlies, ter wille van die uitnemendheid daarvan om Christus Jesus, my Here, te ken. Ter wille van Hom, het alles vir my 'n verlies geword, en beskou ek dit as vullis, sodat ek Christus as wins kan verkry.”
Die woorde “wins” en “verlies” is belangrik. Hy sê wat ook al ‘n wins was, beskou hy nou as verlies. Dit is 'n verlies in vergelyking met die grootheid van om Christus te ken, om wie se ontwil ek alles verloor het. Hou jou prioriteite in perspektief. Moet nie jou vreugde verloor oor dinge wat nie belangrik is nie.
Ek Moet Dink oor My Ambisies en Herfokus
Om Jesus beter en beter te leer ken is die bron van blywende vreugde. Fil. 3:10 (AFR20) sê: “...en sodat ek Christus kan ken, die krag van sy opstanding, en die verbondenheid met sy lyding, deur aan sy dood gelykvormig te word...”. Ken jy Jesus Christus? Jou lewe sal geen impak hê as jy nie Christus ken nie - nie net van Hom weet nie - meer as dit: Hom Ken! My vraag aan jou bly staan:
Is jy nog steeds 'n VREUGDEVOLLE Christen?
Slot
'n Oproep tot Aksie
As volgelinge van Christus word ons geroep om voortdurend herlewing na te streef, vernuwing te soek en te kies om ons daagliks in die Here te verbly. Laat dit 'n uitdaging vir ons almal wees om hierdie beginsels in ons persoonlike en gemeenskaplike geloofsreise uit te leef. Soos ons onsself verootmoedig, God se aangesig soek en transformasie omhels, sal ons die vreugde van die Here ervaar, wat ons versterk en onderhou.
Kom ons bid vir herlewing in ons harte, vernuwing van ons gedagtes en 'n uitstorting van vreugde in ons lewens, terwyl ons met die Here wandel. Mag ons herleef, vernuwe en bly wees in Sy teenwoordigheid.
Vriendelike Groete!
Dr Henri Weideman