Terwyl ons matriekleerders vir hul eindeksamen voorberei, moet hulle daaraan herinner word dat hierdie seisoen nie net oor toetse op papier gaan nie, maar ook oor groei in geloof, dissipline en deursettingsvermoë. Dieselfde geld vir studente in hulle onderskeie studiejare.

Maak asseblief tyd om vir die Graad 12's en studente in u gemeente byeenkoms te bid. Herinner hulle daaraan dat God hulle die vermoë gegee het om te leer, te verstaan en om sukses te behaal. Hulle moet kalm bly, hul bes doen en Hom vertrou met die res. Die Bybel herinner ons in Filippense 4:13 (AFR’83) "Ek is tot alles in staat deur Hom wat my krag gee." Dit beteken dat dit nie saak maak hoe uitdagend die eksamen mag lyk nie, leerders en studente is nie alleen nie: God se krag is elke tree van die pad beskikbaar, maar hulle moet ook hul deel doen.

Berei ywerig voor, rus wanneer nodig, en bid vir gemoedsrus en helderheid van gedagtes. Onthou, jou waarde word nie deur jou punte bepaal nie, maar deur wie jy in Christus is. As jy by elke eksamenlokaal instap, dra selfvertroue, nie vrees nie – want dieselfde God wat jou so ver gebring het, sal jou tot sukses dra.

Spreuke 16:3 (AFR’33/53) herinner ons ook, "Laat wat jy doen, aan die Here oor, dan sal jou voornemens geluk." So, vertrou jou studies en jou toekoms aan Hom, doen die beste wat jy kan ter voorbereiding en glo dat Sy planne vir jou goed is. Hou geloof, bly gefokus en eindig sterk - jy is gemaak vir hierdie oomblik!