In Suid-Afrika betree ons weereens Herfs, 'n seisoen van oorgang. Dit is 'n herinnering dat die lewe nie staties is nie, net soos ons wandel met God nie staties is nie. Net soos die natuur deur verskillende seisoene beweeg, gaan ons geestelike lewens ook deur seisoene van verandering. Soos wat blare van kleur verander en val, is daar tye wanneer ons dinge moet laat vaar wat nie meer ons geestelike groei dien nie. Dit kan ou gewoontes wees, of seer uit die verlede of selfs verhoudings wat die vooruitgang van ons geloofsreis belemmer.

Net soos in die natuur, het elke geestelike seisoen 'n doel. Daar is tye van plant, waar God nuwe drome in ons harte saai, en tye van wag, waar ons Hom moet vertrou - selfs wanneer ons nie onmiddellik resultate sien nie. Daar is ook seisoene van oes, waar ons die seëninge van gehoorsaamheid ervaar, en seisoene van snoei, waar God dinge verwyder om plek te maak vir nuwe groei.

Prediker 3:1 en 11 (AFR’83) sê: “Elke ding het sy vaste tyd, elke ding in hierdie wêreld het sy tyd…. God het elke ding gemaak dat dit pas in ‘n bepaalde tyd.”

Om geestelike seisoene te verstaan, help ons om God se tydsberekening te vertrou. Ons moet elke seisoen omhels vir wat dit bring, sonder om dit te probeer ontken of weg te wens. Maak nie saak waar jy geestelik is nie, weet dat God in jou werk. Of dit nou 'n tyd van rus, vernuwing of transformasie is, Hy is getrou in elke seisoen. Hou aan om in geloof te leef, met die wete dat Sy plan volmaak is.