Incwadi yokwaLusa: imikhiqizo edlule
October 3, 2024
Ikota Yesi-4 Onyakeni We-2024
December 5, 2024Incwadi yokwaLusa: imikhiqizo edlule
October 3, 2024Ikota Yesi-4 Onyakeni We-2024
December 5, 2024
Mndeni we-AFM
I-Apostolic Faith Mission yaseNingizimu Afrika ibe neNgqungquthela ye-General Business Meeting ngomhla ziyi 10 -12 kuMandulo 2024 ebibanjelwe ebandleni elibizwa ngokuthi yi-Word and Life eliseBoksburg. LeNgqungquthela ibihanjelwe izithunywa eziyi-1,683 ezivela amabandleni abhalisiswe ayi-1803, lapho izithunywa zikhethe Abaphathi beHhovisi likazwelonke bebandla abazoba sezikhundleni kusukela ngo-2024 ukuya ku-2028. UDokotela Henri Weideman ubuye wakhethwa njengoMongameli; UMfundisi uBarend Petersen uphinde wakhethwa njengePhini likaMengameli, uMfundisi Selby Khumalo uphinde wakhethwa njengoNobhala Jikelele kwathi uMfundisi Rudi Coertzen waphinde wakhethwa njengoMgcinimafa Jikelele.
UMfundisi uFrank Chikane, nguye obenguMphathi Omkhulu Wokhetho. Sihalalisela abaphathi beHhovisi likazwelonke ebandleni! Siphinde sibonge kuMfundisi uGeorge Mahlobo (uMongameli we-AFM International) ngokuqhuba umcimbi wokubekwa ezikhundleni kwabaphathi beHhovisi likazwelonke behambisana nabalingani babo.
Kulolushicilelo lwencwadi yethu ebhekiswe kuBelusi, siphindela futhi sithwebula umongo wendikimba yeNkomfa yokuvutha amalangabi (ablaze): Yenza kabusha, Vuselela futhi Uthokoze. Sicele Abaphathi beHhovisi likazwelonke, ngamunye ukuthi bahlele kabusha izintshumayelo zabo ebezikhuluma ngokuvutha amalangabi ngendlela efingqiwe nezoba nomthelela. Sikukhuthaza ukuthi uvakashele iwebhusayithi yethu ukuze uthole amanothi ezintshumayelo kanye nokusakazwa bukhoma kwalezizintshumayelo:
https://afm-ags.org/ablaze-conference-renew-revive-rejoice/.
Sithemba ukuthi lezi zinsiza zizokubusisa!
1. YENZA KABUSHA, VUSELELA, THOKOZA: INDLELA EYA EKUBUYISELWENI ESIMOYENI
mpilo isiqola amandla. Izidingo eziqhubekayo zomsebenzi, ingcindezi, nesimo sezwe kungasiqeda amandla, kusenze sizizwe simi-ndawonye futhi sikude noNkulunkulu. Singazithola sidlula ezintweni ezibuhlungu, sinekhono ngokomzimba kodwa singenalo ngokwengqondo nangokomoya. Kulezi zikhathi, kubalulekile ukubona isidingo sokufinyelela kuNkulunkulu ukuze uthole ukuvuseleleka, ukwenziwa kabusha, futhi ekugcineni, uthole injabulo.
Abakwa-Israyeli bazithola bebhekene nesimo esifanayo ngemuva kokubuya kwabo ekuthunjweni eBabele. Nakuba base bebuyele ezweni lakubo, okuningi okwalokho ababekwazi kwase kungamanxiwa. Esimweni sabo esibuhlungu, bafuna ukubuyelana noNkulunkulu hhayi nje ukwakhiwa kabusha kwezindonga ezazibazungezile kodwa izinhliziyo zabo nomoya wabo. Incwadi yamaHubo 85:6 (ZUL59) isibonisa ubuhle bokubuyisana noNkulunkulu: “Awuzukusivusa, sibuye siphile, ukuze abantu bakho bathokoze ngawe na?” Isifiso sabo sokuvuselelwa sasisekelwe ekulangazeleleni ubukhona bukaNkulunkulu, obuholela enjabulweni.
AmaHubo 126:1-3 akhuluma ngobuhle bokubuyelana noNkulunkulu: “Lapho uJehova ebuyisa ukuthunjwa kweSiyoni, sasinjengabaphuphayo. Umlomo wethu wawusugcwala ukuhleka nolimi lwethu ukuhuba.” Uma uNkulunkulu evuselela kuba nomthelela wentokozo ephuphumayo nokubyiselwa ngomdlandla kobukhona bukaMoya oNgcwele obuletha impilo.
Vuselela: Ukuvuselelwa kwemimoya yethu
Ukuvuselelwa kusho ukuthola kabusha impilo, amandla, nesazelo. Imvuselelo iwumsebenzi kaNkulunkulu lapho uNkulunkulu evuselela izinhliziyo zethu ukuze sizwe ubukhona bukaNkulunkulu nokuthi sazi injongo Yakhe. Uvuthisa ngoMoya oNgcwele kabusha uthando lwethu lukaJesu lokuqala, futhi okhele umlilo wobukhona Bakhe phakathi kwethu. Kodwa nathi kufanele sibambe iqhaza. Imvuselelo iqala ekwamukeleni ukuthi siyamdinga uNkulunkulu futhi sifuna usizo Lwakhe.
Njengoba incwadi ye-2 Kronike 7:14 (ZUL59) isikhumbuza, “bazithobe abantu bami ababizwa ngegama lami, bakhuleke, bafune ubuso bami, baphenduke ezindleleni zabo ezimbi, ngiyakuzwa ezulwini, ngithethelele isono sabo, ngiphilise izwe labo.” Imvuselelo idinga intobeko, ukumfuna uNkulunkulu, nokufulathela isono. Akwanele ukuba nemizwa edalwa wukholo. Kumelwe sibengabalandeli bakaJesu bangempela, abalangazelela ubukhona Bakhe.
Loku kusho ukuzibandakanya njalo emkhulekweni umuntu ngamunye kanye nowokuhlanganyela nebandla, ukuphenduka, kanye nokufuna ubuso bukaNkulunkulu.
“Uma uNkulunkulu evuselela kuba nomthelela wentokozo ephuphumayo nokubyiselwa ngomdlandla kobukhona bukaMoya oNgcwele obuletha impilo.”
Yenza kabusha Ukuguqulwa kwezingqondo Zethu
Ukwenziwa kabusha kuyindlela yokuguqulwa, futhi kuwushintsho oluphawulekayo engqondweni, enhliziyweni nasempilweni yethu. KwabaseRoma 12:2 (ZUL59) kuyayala, " Ningalingisi leli zwe, kodwa niguqulwe isimo ngokwenziwa ibe ntsha ingqondo yenu, ukuze nibe nokuhlolisisa okuyintando kaNkulunkulu, okuhle, nokuthandekayo, nokupheleleyo.." Njengoba nje isibungu siphenduka sibe uvemvane, ukwenziwa kabusha kuyinqubo eqhubekayo esiguqula sibe yizidalwa ezintsha kuKristu. Nsuku zonke, kumele simelane nemikhuba yaleli-lizwe futhi sivumele iZwi likaNkulunkulu noMoya ukuba basebenze ngaphakathi kithina,
Kwabase-Efesu 4:22-24 (ZUL59) sitshelwa ukuthi "sikhumule umuntu omdala ongowenkambo yokuqala " futhi "simbathe umuntu omusha owadalwa ngokukaNkulunkulu ekulungeni nasebungcweleni beqiniso” Lokhu kwenziwa kabusha kudinga ukuba sihlaziye izindawo ezimpilweni zethu ezidinga inguquko futhi samukele ukwenziwa kabusha kuKristu.
Intokozo: Intokozo njengendlela esiphendula ngayo
Intokozo iyindlela ejwayelekile uma samukela umsebenzi kaNkulunkulu wokusi vuselela nokusakha kabusha. Njengoba uPawulu eyala kwabaseFiliphi 4: 4 (ZUL59), " Thokozani eNkosini njalonjalo; ngiyaphinda ngithi: Thokozani!”
Akufanele ukuthi intokozo incike ezimweni esizithola sikuzo, kodwa kumele ukuthi incike okhethweni olusekelwe wukholo lwethu nokwethemba ukulunga kukaNkulunkulu. Kuyo yonke iMibhalo, sibona izibonelo zabantu abafana noDavide, ababethokoza eNkosini, ngisho nangezikhathi ezinzima. KumaHubo 51:12 (ZUL59) kuvela isifiso sakhe: " Nkulunkulu, dala kimi inhliziyo ehlanzekileyo, uvuse umoya oqinileyo phakathi kwami. Ungangilahli ebusweni bakho, ungangemuki uMoya wakho oNgcwele. Buyisela kimi ukuthokoza kwensindiso yakho, ungiphase ngomoya ovumayo." Ukuthokoza ngoNkulunkulu kuqinisa umoya wethu futhi kuqinisa ukholo lwethu. Kuyisibonakaliso sokubonga ngomsebenzi uNkulunkulu aqhubeka ukuwenza ezimpilweni zethu, kungakhathaliseki ukuthi sidlula kuziphi izimo.
VUSELELA!
Inkumbulo
Ingqondo yomuntu iwubuxhakaxhaka bemizwa esebenza ngokuxhumana. Lobubuxhakaxhaka bakha amaphethini nezindlela ezilolonga imicabango yethu, izinkolelo, kanye nezenzo zethu. Kungabanzima ukubhidliza lamaphethini, uma esesungulekile futhi agxila ezimpilweni zethu ngenxa yokubekeka esimweni-thizeni yizizukulwane ezisandulelayo, kanye nomthelela womphakathi. Lapho ingqondo yakho iguqulwa, uthola ikhono lokwazi ukuhlola nokwamukela ukuthi iyini intando kaNkulunkulu (KwabaseRoma 12:1-2). Ukuqonda kwethu ukuthi izinto zisebenza kanjani, kanye nezinto esihlangabezane nazo empilweni, kusibeka endaweni yokwazi ukuthi silizwisisa kannjani iphimbo, nentando kaNkulunkulu kanye namacebo kaNkulunkulu ngathi (UJeremiya 29:11).
Letha indumisa kuNkulunkulu uma esebenza ngendlela enamandla ngawe (AbaHluleli 15:14-19)
UNkulunkulu wamsebenzisa ngamandla uSamsoni njengoba sifunda kubaHluleli 15:14. USamson wazithathela udumo ngokunqoba kwakhe lapho ethi “...ngomhlathi wembongolo ngibenze izimbongolo”. Ngemuva kokuthi uSamsoni azithathele udumo lokunqoba, wenza ubudlabha ngokuthi alahle “ithulusi” uNkulunkulu alisebenzisa ukuze anqobe (AbaHluleli 15:17). USamsoni wathi ukunqoba kwakhe kuvela emandleni akhe, hhayi kuNkulunkulu owenza ukuthi anqobe. Khona-ke waphathwa ukoma kodwa uNkulunkulu wadabula umgodi wamupha amanzi ngendlela eyisimangaliso.
Kumele siqaphele lapho sinqoba, ngoba ukunqoba kungasibeka engcupheni enkulu ngemuva kokusetshenziswa ngamandla nguNkulunkulu. Kufanele sizihlaziye isikhashana ngemuva kokunqoba, singakhohlwa yilabo abasisekela ukuze sinqobe futhi singalilahli iladi esakhuphuka ngalo, nalabo ababelibambile ukuze sikhuphuke. Simele sikhumbule ukuthi udumo lungolukaNkulunkulu, ikakhuluzi esikhathini esiphila kuso lapho ekugcwele ukuzidumisa.
Ukuthobeka kufanele kuvuselelwe. Ungazibeki ezikhundleni zikamoya ongagcotshelwanga zona yibandla le-AFM. UNkulunkulu angawenza kabusha umqondo wakho uma uzithoba.
"Simele sikhumbule ukuthi udumo lungolukaNkulunkulu, ikakhuluzi esikhathini esiphila kuso lapho ekugcwele ukuzidumisa."
Owesifazane owayenenkinga yegazi
Sonke sifundile ngendaba owesifazane owayenomopho iminyaka eyishumi nambili nokuphiliswa kwakhe. Nakuba wayesechithe yonke imali yakhe ukuze aphile, isimo sakhe sasiloku siba bucayi kakhulu. Kuyaphawuleka ukuthi esahlukweni esilandelayo, indaba yokuphulukiswa kowesifazane nguJesu iyakhunjulwa.
Kusobala ukuthi kusukela ngesikhathi uJesu ehlangana ubuso nobuso naye, wasikhohlwa isixuku, wakhuluma nalo-wesifazane njengokungathi uyena yedwa emhlabeni, noma ukugula kwakhe kwakumenza sengathi akabalulekile, unenkinga eyayimenza abe ngongcolileyo. Noma kunjalo uJesu wazinikela ngako konke kulomuntu oyedwa owayengabalulekile. Siphangisa kakhulu ukubeka abantu amabala noma izici, futhi sibaphathe njengabantu abangabalulekile. KuJesu, umuntu kanalo nelilodwa ibala nesici kulezo azibekwa ngabantu. Wayengumuntu oswele. Uthando kalucabangi ngabantu ngokubaluleka kwabo.
Umlilo Wesibili
Le ndaba-ke, imayelana nesikhathi sasekuseni esesikufikele – akuyona-nje into ephathekayo kodwa futhi kungumzekelo wokufika kwesikhathi esisha. Ngalolusuku olusha lwasekuseni, uJesu wabonakala ogwini, kodwa abafundi babengakaqondi ukubaluleka kwalesisikhathi ngoba babengaboni ukuthi umuntu osogwini nguJesu. Lapho befika emhlabathini owomileyo, bahlangatshezwa umbono obalulekile. Lombono kwakungowomlilo wamalahle ashisiweyo.
Umlilo wokugcina, lapho uPetru noJesu babendawonye khona, yilowo esifunda ngawo encwadini kaJohane 18. Lowo-mlilo wawuletha inkumbulo yokuba sesimweni sokungamukeleki nesimo esibandayo, esasinemibuzo enonya. UPetro wayeziqinisa isibindi kulesisimo esiyingozi. Wayeyedwa, enovalo, enokwesaba, ehlazekile, esezinhlungwini ebona sengathi impilo yakhe isifinyelele ekugcineni. Umlilo wokuqala wawuyindawo lapho uPetro aphika khona uJesu kanti umlilo wesibili umayelana nokubuyiselwa kwakhe esikhundleni. UJesu usebenzisa umlilo wesibili okubekwe kuwo izinhlanzi nesinkwa ukuze asuse inkumbulo yomlilo wokuqala. Inkumbulo yobuhlungu bomlilo wokuqala isulwa ngumlilo wesibili ongumlilo wokunqoba. Unikwa umyalelo omusha wokondla izimvu zikaJesu.
3. UKWENZIWA KABUSHA AMANDLA OKHOLO LWAKHO
NgesiHebheru, igama elithi "RENEW" lisho "inguquko." Lomqondo wokuguquka ubonakala emiBhalweni, ikakhulukazi ku-1 Samuweli 10:6 (CZB24), othi, "Umoya kaJehova uzakufika phezu kwakho, uprofethe kanye nabo, uguqulwe ube ngomunye umuntu.” Lokhu kutshengisa inguquko ebalulekile enokwenzeka uma sihlangana noNkulunkulu. U-Isaya 40:31 (ZUL59) uyasikhumbuza ukuthi, " kepha abamethembayo uJehova bayathola amandla amasha.” Lesi sethembiso sisekelwe ekuzwisiseni ukuthi uNkulunkulu wethu, "ohlezi ngaphezu kwesiyingi somhlaba" (Isaya 40:22), akadinwa futhi akakhathali. Usipha ukunqoba lapho siphelelwa khona yithemba. Lokhu kwenzeka ngokholo namandla engeziwe. Sibizelwe ukuba sibambe iqhaza ngenkuthalo kulolu hambo lokwakhiwa kabusha, siqonde ukuthi amandla ethu kawaveli kithina kodwa avela eNkosini.
Abantu BakaNkulunkulu nezigaba zokwakhiwa kabusha Ku-Isaya 40
U-Isaya uveza uhambo olusuka ekuphelelweni yithemba luye ekwakhiweni kabusha:
- 1. Ukuphelelwa yithemba (40:27): Ama-Israyeli aphelelwa yithemba ngesikhathi sokuthunjwa, ebuza uNkulunkulu ukuthi ingabe uyasazi yini isimo sawo. U-Isaya ukhuluma ngokungaqiniseki kwabo, eqhakambisa ukungqubuzana phakathi kwenkolo yabo nokungabaza.
- 2. Ubukhulu bukaNkulunkulu (40:28-29): U-Isaya ugcizelela ingqikithi kaNkulunkulu waphakade, onamandla okudala, namandla angenamkhawulo. Lokhu kuqonda kubalulekile ekunqobeni ukuphelelwa yithemba.
- 3. Ukwenziwa kabusha Kwethu (40:30-31): Kugcizelelwa ukubaluleka kokulinda iNkosi. Ukulinda kubonisa ukuncika kuNkulunkulu kwangempela, nokwethemba isikhathi uNkulunkulu azosihlinzeka ngaso.
“Sibizelwe ukuba sibambe iqhaza ngenkuthalo kulolu hambo lokwakhiwa kabusha, siqonde ukuthi amandla ethu kawaveli kithina kodwa avela eNkosini.”
Ikholwa elinamaphiko okhozi
Umzekelo ka-Isaya wokukhuphuka ngamaphiko njengezinkozi ubonisa indlela inkolo eletha ngayo inguquko. Njengoba nje uNkulunkulu athwala abakwa-Israyeli "ngamaphiko okhozi" (Eksodusi 19:4), uyabanika amandla amasha labo ababeka ithemba labo Kuye. "Bayokhuphuka ngamaphiko njengezinkozi," - okubonisa ukukhuphuka okuqhubekayo ngaphezu kwezinselelo zokuphila. "Bayogijima bangakhathali." - okubonisa amandla nenqubekela phambili etholakala okholweni. "Bayohamba futhi bangapheli amandla." - okubonisa ukubekezela okudingekayo ekuphileni kwansuku zonke, ngisho nangesikhathi sezilingo.
Uhambo lokholo luvamile ukusiqeda amandla, kodwa uNkulunkulu uyasiqinisekisa ngamandla amasha:
- Amandla engeziwe: AmaHubo 84:5, 7 akhuluma ngalabo abanamandla eNkosini, besuka emandleni beya emandleni.
- Ukholo olwengeziwe: KwabaseRoma 1:17 kuqhakambiswa ukuphila ngokholo, futhi ngisho nangezikhathi zokungabaza, ukuze simemeze sithi, "Siza ukungakholwa kwami" (NgokukaMarku 9:23-24).
Umusa kaNkulunkulu ungaphezu kokwanele ebuthakathakeni bethu. Njengoba uPawula ecabanga encwadini yesi-2 KwabaseKorinte 12:7-10, ukuthi kusebuthakathakeni bethu lapho amandla kaKristu apheleliswa khona. Masikhumbule uGideyoni namadoda akhe, abathi, naphezu kokukhathala kwabo, baphikelela ekuphokopheleni kwabo kuBahluleli 8:4. Kwangathi singaphakama njengezinkozi, sigijime singakhathali, sihambe singaphelelwa amandla. Siyambonga uNkulunkulu ngesethembiso sokwenziwa kabusha.
4. UKUGCINA INTOKOZO YAKHO!
Uyayikhumbula intokozo owaba nayo ngesikhathi uqala ukwazana neNkosi? Lolo gqozi lokuthi konke kwenziwe kwaba kusha? Kungani amaKristu amaningi elahlekelwa intokozo yawo na? Kunezinye izinto ezinenhloso yokukwaphuca intokozo yakho. Uma ungazi ukuthi ziyini futhi uma ungathathi izinyathelo ezifanele, uzozithola usulahlekelwe intokozo yakho.
Kunezinto ezintathu KwabaseFiliphi 3:1-10 eziphathelene nendlela yokugcina intokozo yakho ngenkathi ukhonza INkosi. KwabaseFilipi 3:1 uthi: " Elokugcina, bazalwane bami, thokozani eNkosini. Ukunilobela khona lokho angikwenqeni, kepha nina kuyanigcina." Kulombhalo, uthi kunezivikelo ezintathu zokuvikela intokozo yakho.
Kumele Simelane nendlela yokuncika eMthethweni
Ukuphila ngendlela yomthetho kubulala injabulo. Kubhubhisa injabulo empilweni yomKristu ngaphezu kwanoma yini enye engiyibonile. Ukuhamba ngomthetho nemikhuba kuba wumgoqo phakathi kobuhlobo bami noKristu. Kususa ukugxila kwakho kulokho uNkulunkulu akwenzele kona futhi kancane-kancane kukwenze ugxile kulokho wena okwenzela uNkulunkulu. ETestamenteni Elisha, kwakukhona iqembu labantu ababebizwa ngokuthi baqhakambisa inkolo yobuJuda. Babethi: "Yamukela uJesu Kristu njengeNkosi noMsindisi wakho, bese nawe ugcina nemithetho ethile yobuJuda."UPawula uthi "Xwayani izinja, xwayani izisebenzi ezimbi, xwayani abasokayo. Ngokuba singabokusoka thina esikhonza ngoMoya kaNkulunkulu, sizibonga kuJesu Kristu, singathembi enyameni (KwabaseFilipi 3:2-3: CZB24). Isivikelo sokuqala yilesi: Uma ufuna ukugcina intokozo yakho, phila usuku ngalunye ngomusa.
Ukuphila ngokomthetho kubeka ithemba lakho emikhubeni yezenkolo. KwabaseFilipi 3:5 (ZUL59) uthi: "Ngasokwa ngosuku lwesishiyagalombili ngingowohlanga luka-Israyeli.” Namuhla, umKristu angase athi, "Ngabhapathizwa," noma "Ngathatha ubulungu bebandla," noma "Ngidla Isidlo SeNkosi." UPawula uyaqhubeka nokuchaza impilo yakhe yaphambilini:
Ubuhlanga. KwabaseFilipi 3:5 (ZUL59): "ngingowohlanga luka-Israyeli, owesizwe sakwaBenjamini" - Nginozalo lwasebukhosini.
Inkolo. Fil 3:5: "NgingumHebheru wamaHebheru." Kukhona abantu lapha abangathi ngingum-AFM!!
Imithetho. Fil 3:5: "Ngokuqondene nomthetho, ngangingumFarisi." AbaFarisi babeyiqembu elikhethekile futhi elibalulekile enkolweni yamaJuda.
Udumo. Uma uncike ekuthini waziwa kangakanani, nawe sewungene enkingeni yokuncika emthethweni. "Ngokushisekela ngingowazingela ibandla, ngokulunga okusemthethweni ngingongasolekiyo."
Akukho lutho olubi nganoma iyiphi yalezi zinto. Inkinga nje iwukucabanga ukuthi lezizinto zikunika amaphuzu kuNkulunkulu, kanti Yena (uNkulunkulu) ukuthanda ngaphandle kwemibandela. Uma uqala ukuthembela kulezizinto, uzolahlekelwa injabulo yakho. Izinkolelo zisekelwe ekwenzeni imisebenzi ethile, kodwa ubuKristu busekelwe kumuntu, uJesu Kristu.
“Izinkolelo zisekelwe ekwenzeni imisebenzi ethile, kodwa ubuKristu busekelwe kumuntu, uJesu Kristu.”
Kumele ngihlole kabusha engikwenzayo
Abantu abaningi bafuna injabulo ezindaweni ezingalungile. KwabaseFilipi 3:7-8 (ZUL59) uMphostoli uPawula uthi: "Kanti-ke lokho okwakuyinzuzo kimi ngakushaya indiva ngenxa kaKristu. Yebo impela, konke ngikushaya indiva ngobukhulu bokumazi uKristu Jesu iNkosi yami, engilahlekelwe yikho konke ngenxa yakhe, ngikushaya izibi, ukuze ngizuze uKristu, '
Amagama athi "inzuzo" nelithi "ukulahlekelwa." abalulekile. Uthi noma yini eyayiyinzuzo kuye manje useyibheka njengokulahlekelwa uma eqhathanisa konke loku nobukhulu bokumazi uKristu. Ngimele ngigcine izinto ngokubaluleka kwazo. Ungalahlekelwa injabulo yakho ngezinto ezingabalulekile.
Kufanele ngibuyekeze izifiso zami kabusha
Injabulo engapheli ivela ekwazini uKristu kangcono. KwabaseFilipi 3:10 (ZUL59) uthi: "' ukuze ngimazi yena, namandla okuvuka kwakhe, nokuhlanganyela ezinhluphekweni zakhe, ngimfuze ngokufa kwakhe.”
Uyamazi uJesu Kristu? Ukuphila kwakho ngeke kube nomthelela omuhle uma ungamazi uKristu - noma ungazi, Ngaye - ngaphezu kwalokho: Mazi! Umbuzo wami kuwe usalokhu uthi:
Usenguye uMkristu ogcwele intokozo na?
ISIPHETHO
Isimemo sokuthi senze. Njengabalandeli bakaKristu, sibizelwe ukuba siqhubeke njalo silandela imvuselelo, sifune ukwenziwa kabusha, futhi sikhethe ukujabula eNkosini nsuku zonke. Lokhu makube yinselelo kithina sonke ukuthi siphile ngalemigomo ohambweni lwethu lokholo umuntu ngayedwana nebandla njengenhlaniso yabakholwayo. Uma sizithoba, sifuna ubuso bukaNkulunkulu, futhi samukela inguquko, siyothola injabulo eNkosini, ezosiqinisa futhi isisekele.
Masikhulekele imvuselelo ezinhliziyweni zethu, ukwenziwa kabusha kwezingqondo zethu, nokuthululwa kwenjabulo njengoba sihamba neNkosi. Kwangathi singaphila sivuselelekile, senziwe saba-basha, futhi sithokozela ubukhona Bakhe.
Ngezilokotho zobuhlobo
UDkt Henri Weideman