Ukusebenzisana Nomphakathi

UKUSEBENZISANA NOMPHAKATHI
Ukubandakanyeka kwebandla nezingqinamba zomphakathi wangasekhaya.

Incazelo:

“Inkambo yokulunga” kithina, isho ukwenza okulungile ngokwemigomo yeBhayibheli.

“Ukuhambisana nenhlalo-mnotho” kusho ukuzibandakanya kwethu ngendlela efana nekaKrestu ezimweni zemvelo, zezomnotho nezobudlelwano abantu nemiphakathi abazithola bekuzo.

Amagama asho okufanayo:
• Ukusiza abanye abantu ukuba bahlangabezane nezidingo zabo
• Ukufinyelela kubantu abadinga usizo
• Ukwenza okuhle kwabanye
• Ukuphakanyiswa
• Ukwenza umehluko ezimpilweni zabantu nsuku zonke
• Ukusiza uqobo lomuntu lonke

Incazelo emfishane:
Njengebandla, sigqugquzela ukwenziwa kweqiniso nobulungiswa emphakathini kanye nokuzibandakanya ngokuphelele ekuphilisweni nasekuvuselelweni kwemiphakathi yethu.

Amavesi Amqoka:
• Ngokuka-Isaya 58:6-8
• NgokukaMatewu 10:8
• NgokukaMatewu 25:35
• NgokukwaLuka 4:18
• NgokukwaLuka 14:13+14
• NgokukaJakobe 1:27

Ukuzibandakanya kwethu emiphakathini yethu kubaluleke kakhulu. Kusukela esitatimendeni sethu senhlosombono: “Sibona ibandla okungena kulo bonke abantu, sigubha ukubumbana kwethu kanye nokwahlukahlukana kwethu okudalwe nguNkulunkulu, sinika amalungu ethu amandla okunakekela nokuguqula imiphakathi yethu ukuze kudunyiswe uNkulunkulu.”

Okusikhuthaza kakhulu ekubeni yisibusiso emiphakathini yethu akusikho ukuthanda ukusiza abantu noma ukugqugquzela inhlalakahle, kepha nguthando lukaNkulunkulu. Khumbula ukuthi uNkulunkulu wathumela iNdodana Yakhe – engayithumeleli ibandla kuphela kodwa umhlaba wonke. Usebenzisa ibandla lakhe ukuba libe yithuluzi lakhe lokuxhumana nomhlaba, imiphakathi yethu.

Yize ubizo lwethu luyisisekelo seSu Elilodwa Lokwenza Le-AFM, ukuhambisana kwethu nenhlalo-mnotho kubalulekile ukufeza ubizo lwethu. Izinga lomthelela esinawo emiphakathini yethu lizonquma ukuphumelela kwethu obizweni lwethu. Umthelela esinawo emiphakathini yethu ungalinganiswa ngesisho esaziwa kakhulu esithi: “Ngabe umphakathi enikuwo uyonikhumbula uma indlu yesonto ingavalwa?”

Sibuye sisebenzele emiphakathini ehlaselwe kakhulu ngoMubi. Ingxenye enkulu yomphakathi waseNingizimu Afrika ihlukumezeka ngenxa yezimo ezimbi kwezenhlalo-mnotho. Ngisho ngabe izizathu zalesi simo ngezintsha noma ngezakudala, ibandla soze lamela kude bese lisola uhulumeni noma izinhlangano ezigqugquzela inhlalakahle. Uma singasiza noma senze abantu ukuba bakwazi ukuzisiza, kungabe senze into encomeka kakhulu. Ibandla kumele lisize abantu abanjalo ngokubanakekela, ngokubanikeza amandla nangokubabela.

Uma sizibandakanya kwezenhlalo-mnotho, kumele singabenzi abantu ukuba bangabe besakwazi ukuzimela. Lokhu kudala ukuba bazibone benelungelo lokukhangezwa izinto – Indlela yokucabanga esisabalele kakhulu lapha eNingizimu Afrika. Sidinga ukunikeza abantu amandla ukuze bakwazi ukunakekela izimpilo zabo nekusasa labo – ngamanye amazwi, basize abanye ukuba bahlangabezane nezidingo zabo. Uma singasiza abantu ngoqeqesho olunenjongo kanye nangokudala imisebenzi, siyobe senze kahle.

Akhona ngempela amabandla ambalwa emiphakathini yethu anezindaba ezinhle ezimayelana nempumelelo angazixoxa mayelana nalokhu.

 

 UKUSEBENZISANA NOMPHAKATHI